Du må være innlogget for å få tilgang til alle nyheter! Logg inn eller opprett brukerkonto.

Newzealandar jaktar slektningar i Egersund

Newzealandar jaktar slektningar i Egersund

MØTTE SLEKTSGRANSKAR: Familien til Paul Donnell (t. v.) har leita etter slektningane sine i Egersund heilt sidan 1950-talet. Newzealandaren har fått nytt mot etter å ha fått kontakt med slektsganskar Øystein Blitzner Netland. FOTO: Merete Horpestad

Paul Donnell frå New Zealand er på leit etter slektningar i Egersund. Øystein Blitzner Netland, som driv med slektsgransking, vil hjelpa han.

Tekst:

Publisert:

Oppdatert:
28.10.2015 kl 10:33

Sundag føremiddag banka det på døra til slektsgranskar Øystein Blitzner Netland i Egersund. Utanfor stod ein kar som kom langvegsfrå.

Paul Donnell er frå New Zealand. Men oldefaren hans var frå Noreg. Og etter det Paul er blitt fortald, var han frå Egersund.

Heilt sidan 1950-talet har familien til Paul prøvd å finna ut meir om den norske utvandraren i slekta. Nå har Paul overtatt arbeidet som onkelen og mora sette i gang, men ikkje lukkast med.

– Eg gjer dette for mor si skuld, seier Paul.

Første gongen han var i Egersund, var i 2007 . Då hadde han mora med seg. Ho var på noregstur i 2002 òg, men då hadde ho ikkje anledning til å ta turen innom Egersund.

Nå lever ikkje mora lenger, men Paul har sett seg føre å halda fram med å jakta på anane sine.

Øystein Blitzner Netland har drive med slektsgransking heilt sidan han greidde å spora opp sin eigen oldefar, som i si tid forsvann i USA. Blitzner Netland er styremedlem i foreininga DIS Rogaland, Slekt og Data. DIS-Norge, Slekt og Data, er den største slektsgranskarorganisasjonen i landet.

Det var niesa til Paul Donnell som oppretta kontakten med Øystein Blitzner Netland. Ho har òg vore i Egersund for å leita etter slektningane sine. Paul Donnell tok kontakt med slektsgranskaren per e-post, før han bestemde seg for å gå på besøk. Han tok ein snartur til Egersund i forbindelse med at han besøkte broren sin i England.

Då Øystein Blitzner Netland fekk newzealanderen på besøk sundag føremiddag, bestemde han seg for å gjera det han kan for å hjelpa han.

Det er fleire grunnar til at det så langt har vore vanskeleg å spora opp det norske opphavet til Paul Donnell. Det var slett ikkje uvanleg at nordmenn som utvandra, tok eit nytt namn når dei gjekk i land på framand jord. Oldefaren til Paul kan ha valt «Hansen» fordi det var lett å uttala. Om det er tilfellet, vanskeleggjer det jobben med å finna opphavet hans.

Han kan òg ha vore son av ein som heitte Hans, og dei var det mange av. Oppføringar frå starten av 1800-talet er dessutan temmeleg unøyaktige.

Men trass i dei mange hindringane; Øystein Blitzner Netland ser ikkje heilt svart på oppgåva han har tatt på seg. Det har nemleg aldri før vore lettare å spora opp gamle slektningar enn det er nå. Mykje av det ein før måtte reisa rundt og leita etter i gamle kyrkjebøker, kan ein nå søkja etter på nettet.

Slektsgranskaren har allereie funne ein kar han har mistanke om at kan vera tippoldefaren til Paul Donnell. Denne karen var skomakar og heldt til i ei sidegate til Strandgaten i Egersund. Men det står igjen ein del arbeid før Øystein Blitzner Netland kan seia om han har gissa rett. Blant anna må han ta ein tur til Fredrikstad, for å undersøka nokon leietrådar der.

– Det blir ein omfattande jobb. Men eg håper me er på rett spor, seier Øystein Blitzner Netland.
Øystein Blitzner Netland har tatt oppgåva på seg som ei venneteneste. Frå første stund opplevde han at han fekk god kontakt med mannen som stod på trappa. Begge trur vennskapen kjem til å vara.

– Det er det som er kjekt med slektsgransking; du møter så mange hyggelege folk, seier Øystein Blitzner Netland.

Paul Donnell har farsslekt i Irland.

– Tremenningen min har gjort ein stor jobb for å spora opp slekta i Irland. Eg har vore så heldig at eg har fått treffa sonen til ei grandtante eg ikkje visste eg hadde. Han var 94 år då eg møtte han. Slikt rører meg, seier Paul Donnell.

Han håper at han har slektningar i Egersund òg som han etter kvart kan få treffa. Øystein Blitzner Netland trur det kan la seg gjera, viss det viser seg at skomakaren er den rette tippoldefaren hans.

Paul Donnell seier følgjande om kvifor han er så opptatt av slekta si.:

– For oss er familien veldig viktig og noko me held kjært.

– Er newzealandarar spesielt opptatt av å spora opp opphavet sitt, sidan dei fleste er etterkomarar av immigrantar?

– Eg veit ikkje. Eg trur det varierer frå person til person, seier Paul Donnell. Sjølv har han blitt meir interessert i opphavet sitt etter kvart som han har blitt eldre.

– Då eg var yngre, var eg ikkje særleg interessert. Interessa for den irske slekta mi kom etter at eg såg ein film om Irland. Filmen rørte meg, fortel den sportsinteresserte regnskapsføraren frå New Zealand.

Nøkkelord

Nyheter fra andre aviser

Do NOT follow this link or you will be banned from the site!