Du må være innlogget for å få tilgang til alle nyheter! Logg inn eller opprett brukerkonto.

Reiste seg ved 
hjelp av musikken

Reiste seg ved 
hjelp av musikken

PÅ PLATE: Gunhild-Malena Oma har omsett sorg og vonde opplevingar til tonar og ord, som ho har samla på plata «Through it all» FOTO: Privat

Ved å omsetja sorg og vonde opplevingar til ord og tonar, fekk Gunhild-Malena Oma oppleva at livet blei bra igjen.

Tekst:

Publisert:

Oppdatert:
19.05.2016 kl 11:51

Gunhild-Malena Oma har gitt ut ei plate som ho har kalla «Through it all». Ho har saktens gått gjennom ein heil del.

– Med plata mi vil eg gi håp til andre som har hatt det vanskeleg. Det går an å reisa seg og få det godt igjen, seier ho.

Då ho vaks opp i Bjerkreim, blei Gunhild-Malena mobba.

– Å skriva blei min måte å uttrykka kjenslene mine på, fortel ho.

Ho sa takk for seg allereie som 16-åring. Då reiste ho vekk for å gå på folkehøgskule.

– For meg var det godt å koma vekk, seier 34-åringen, som nå bur på Slemdal i Oslo.

I barndomsåra var det dikt ho skreiv. Musikken har følgd henne heile livet, men det var først då faren døydde, at ho begynte å skriva sine eigne songar. Magnor Oma var kjend i Bjerkreim både som skulemann og politikar, før han og kona flytta til Bryne i 2004. Magnor Oma døydde i 2011.
Ved å skriva songar fekk Gunhild-Malena arbeidd seg gjennom sorga over faren.

– Det blei min måte å formidla kjenslene mine på, fortel ho.

Det var mange kjensler som sprengde på.

– Å mista nokon ein er glad i er ei stor omvelting for alle. Ein skal gjennom mange fasar, seier ho.

Ein av fasane Gunhild-Malena måtte gjennom, tæra hardt på den kristne trua hennar. Vendepunktet kom då ho reiste til Israel.

– Det å sjå kor Jesus hadde gått, gav meg ein ny giv. Det heile blei meir reelt for meg, fortel ho.

På jobb som frivillig medarbeidar i den kristne tv-kanalen Kanal 10 kom Gunhild-Malena i kontakt med ein plateprodusent. Han viste interesse for songane hennar, og han hadde lyst å spela dei inn.

– Eg var litt i tvil om eg var flink nok til å spela inn plate. Då var det godt å ha ein produsent som heia meg fram, seier ho.

Den skjøre sjølvtilliten hennar, som hadde fått røynt seg så kraftig i oppveksten, blei meir robust etter som prosjektet skreid fram.

– Sjølvtilliten min kom tilbake under innspelinga, fortel ho.

Ikkje bare har sjølvtilliten hennar kome tilbake; ho er òg på god veg til å få eit normalisert forhold til mat. Dei vonde opplevingane frå oppveksten har gitt seg utslag i eteforstyrringar, som ho nå merkar stadig mindre til.

– Det handlar om å finna noko du brenn for. I det ligg det motivasjon til å bli frisk, seier ho og legg til at ho har fått god støtte frå venner i prosessen.

Songane hennar er blitt spelte både på radio og tv, og ho er òg blitt bedt om å framføra songar «live». Det ønskjer ho å gjera meir av.

– Eg håper at eg kan reisa rundt og formidla songane mine, seier ho.

Songane hennar har ein kristen bodskap, men er ifølgje tekstforfattaren brukande i alle miljø.
Plata hennar er tilgjengeleg både på Spotify og Itunes. Ein musikkvideo er òg under produksjon.

Gunhild-Malena Oma trur faren hadde likt at musikken hennar nå er gjort tilgjengeleg for alle.
– Far likte at eg song for han. Eg song i gravferda hans òg, seier ho.

Gunhild-Malena Oma er utdanna innan musikk, teologi og sosialpedagogikk, og har jobba både i kristne forsamlingar og i psykiatrien. Ho bruker òg ressursane sine i lovsongstemaet i forsamlinga ho går i, samt som forkynnar og songar i den kristne tv-kanalen Gospel Channel. Ho er opptatt av å bruka livserfaringa si på kunna hjelpa andre.

Nyheter fra andre aviser

Do NOT follow this link or you will be banned from the site!