Du må være innlogget for å få tilgang til alle nyheter! Logg inn eller opprett brukerkonto.

Kari-Irene Sødergren

Kari-Irene Sødergren

 

Alder: 57 år Bur: Pittergarden på Vikeså Aktuell: Spelte på mange strenger under Bjerkreims-marken Herleg hektisk med Marken   Kari-Irene Sødergren har vore høgt og lågt i helga, men lite i senga. Markenshelga er travel for mange, iallfall for dei fleste i Bjerkreim. Men Kari-Irene Sødergren er nok blant dei som har hatt det mest hekstisk dei siste døgna. Tre heile dagar til endes har ho stått på stand og selt sau, iallfall litt av sauen: ytterlaget. Pledd og sitjeunderlag, tøflar og vestar, babyposar og voggefellar var å få kjøpt eller bestilt frå standen hennar i Ullgadå på Bjerkreimsmarken. Det aller meste har ho laga av skinnfellar frå bjerkreimsauer, anten frå eigen gard, der ho har sju vinterfôra, eller frå garden til samarbeidspartnaren Alf Hegelstad. Etter at første markensdagen var over på sjølve messeområdet, fór Kari-Irene Sødergren heim til Pittergarden for eit aldri så lite sceneskifte. Fredag kveld og natt var ho nemleg pubvertinne og konsertarrangør då eks-vampar Jan Ingvar Toft varta opp med stemningsfull visepop i pittergardsløa. Klokka hadde passert to då løa var sånn nokolunde rydda og Kari-Irene kunne unna seg nokre timar i senga for å lada batteria til neste markensdag. Klokka ni laurdag morgon opna ho standen sin igjen i messehallen. Gjennom firmaet med same namnet som garden, driv Kari-Irene og mannen Karl Emil Sødergren tre ulike verksemder: sauefellproduksjon, kulturformidling og grøn omsorg-konseptet Inn på tunet. Heldigvis er ikkje alle arbeidsdagane like travle som markensdagane. - Det er gildt å vera aktivt med på Marken. Det er kjekt at det skjer noko, kjekt å treffa folk og veldig motiverande få respons på det eg driv med, seier Kari-Irene Sødergren, som sannsynlegvis kjende seg meir som ei fille enn ein fell då ho endeleg kunne flata ut - kanskje på ein saueskinnsfell - i går kveld. - Kva skal du gjera i dag? - Eg har mange bestillingar for tida, så eg skal arbeida litt. Og så blir det veldig spennande å få besøk av minstejenta som kjem heim med den nye kjærasten sin for første gong. Dei har invitert seg på middag og skal få ost innbakt i kylling, båtpotetar og salat. - Har du flaks? - Eg er iallfall positiv av natur, og synest at mykje går min veg. - Kva vil du helst gjera ein laurdagskveld? - No når eg har det så travelt, vil eg helst bare slappa av, gjerne på hytta på Evje. - Kva for ein serveringsstad i Dalane liker du best? - Det er ikkje så ofte me går ut og et, men Grand Hotell er bra. - Er du fornøgd med ordføraren din? - Ja, han er romsleg og veldig tilgjengeleg. - Kva liker du å gjera om hausten? - Eg liker å gå tur og plukka bær, og så er det fantastisk fint å gå på barfrost og sjå på alle dei nydelege fargane. - Kva les du før du sovnar om kvelden? - Eg les ikkje; eg løyser sudoku. Ingenting er meir avslappande enn det. - Skal du ha ferie i løpet av hausten? - Nei, me hadde ein liten ferie i september. Då var me i Warzawa.



For å se innholdet må du ha gyldig abonnement.

Hvis du allerede har abonnement, logg inn via Min Side:

Logg inn

Nyheter fra andre aviser

Jærbladet

Strandbuen

Solabladet

Sandnesposten

Gjesdalbuen

Avisen Agder

Do NOT follow this link or you will be banned from the site!