Du må være innlogget for å få tilgang til alle nyheter! Logg inn eller opprett brukerkonto.

Kjellaug Marie Bakke

Kjellaug Marie Bakke

 

    Poesi frå eit enkelt kvardagsliv Alder: 69 år Bur: På Svela i Bjerkreim Stilling: Avløysar for son sin Aktuell: Har gitt ut diktsamlinga «Takk Gud for livet» Dikta hennar har vakse på grasrotplanet. Kjellaug Bakke hadde aldri tenkt at det skulle bli bok av dikta hennar. Dei er jo bare ei samling erfaring frå eit «ganske alminneleg og enkelt kvardagsliv». - Dei handlar helst om småting. Av og til har det gått opp for meg at småting er gyseleg viktige. Då har eg skrive det ned, forklarer Kjellaug Bakke. Dei 26 dikta i «Takk Gud for livet» er blitt til over cirka 30 år. - Det eldste er «Den vesle handa». Det kan eg tidfesta; eg skreiv det då minstejenta var fire. Men dei fleste er nok blitt til i løpet av dei 15 siste åra, seier ho. Ho grip enno til pennen når småting blir store for henne. Men det har blitt sjeldnare. - Eg føler at eg har eldst veldig i det siste. Då Julian blei født i juli, og eg blei oldemor, følte eg at eg tok ein heil generasjon i éin jafs. Det spørst om det er så mykje meir som lør i hovudet mitt no, smiler Kjellaug Bakke. Ho tenkjer at det eigentleg er naturlovstridig at ei oldemor gir ut bok. - Folk har lenge vore etter meg og spurt om eg ikkje skulle gi ut noko av det eg har skrive. Men eg har sagt beint nei. Eg kunne ikkje sjå føre meg at nokon skulle vilja kjøpa dette her. Men i fjor gjekk dotter mi Ingunn på meg litt tungt og nesten påla meg å gi det ut, fortel Kjellaug Bakke. Dottera hadde kontaktar i bokbransjen. - Ho kjende ein på Bok & Media i Stavanger. Etter å ha reinskrive for harde livet i fjor, tok eg bussen til Stavanger ein dag. På eit gatehjørne trefte eg Ingunn, som bur på Rennesøy. Så gjekk eg saman med henne for å levera frå meg skriveria, skildrar kvardagspoeten. At forlagssjef Tarald Ueland i Sambåndet Forlag AS er jærbu, som ho sjølv, har nok vore ein fordel, trur Kjellaug Bakke. - Han har nok hatt sansen for skildringane frå Jæren. At han har sørgt for at Solveig Serigstad Hauge si teikning av vipa har fått plass på baksida av boka, er eg spesielt glad for, seier forfattaren. Som tittelen antydar, handlar mange av dikta om tillit og takksemd til ein allmektig Gud. - Det å vera éin av fire generasjonar har eg no fått oppleva tre gonger; første gongen då eg sjølv var blitt mor til ho som no er blitt bestemor. Ingen kan bestemma seg for slikt. Det er noko me bare må ta imot, som den gåva det er, seier den bokaktuelle avløysaren på Svela. - Kva skal du gjera i dag? - Det er ikkje så stor variasjon i dagane mine. Eg skal i fjoset om morgonen. Seinare skal eg kanskje ned til Forbruken og handla. Elles blir det vel det vanlege. - Har du flaks? - Langt ifrå. Det er ikkje flaks eg lever av. Då ungane var små, var det ei straff å ha dei med på basar. Dei såg på alle dei andre som fekk gevinstar mens me aldri vann noko sjølv. Ungar forstår ikkje sånt. Nei, vinnarflaks var ei nådegåve eg ikkje hadde, følte eg. - Kva vil du helst gjera ein laurdagskveld? - Eg kan godt leggja i omnen og setja meg til med ei god bok. Det gjer meg ingenting å vera aleina. Men det er òg fint å vera i hop med gode venner og ha noko godt å eta. - Kva for ein serveringsstad i Dalane liker du best? - Då eg voks opp, var det å gå på kafé noko så aldeles fjernt. Det sit nok i meg enno. Viss alle hadde gått så lite ut og ete som eg, hadde det vore biringt for restaurantbransjen. Men når det ein sjeldan gong skjer, er det jo storveges å gå og eta noko som ein ikkje har stelt i stand sjølv. - Er du fornøgd med ordføraren din? - Ja! - Kva liker du å gjera om hausten? - Om hausten røskar eg rundt i hagen og gjer han klar for vinteren. Men det må vera vêr til det; eg er lik katten og liker ikkje å bli blaut. - Kva les du før du sovnar om kvelden? - Eg liker å lesa, men det eg les om kvelden, det les eg mens eg sit oppreist i ein stol. Når eg legg meg, skrur eg av lyset. - Har du hatt eller skal du ha ferie i løpet av hausten? - På grunn av den her boka, kan eg måtta farta litt rundt, så eg har sagt til Nils Olav (sonen, red. anm.) at eg kanskje blir litt ustabil i avløysararbeidet i haust. Det var derfor heilt bevisst at eg ikkje tok meg nokon ferie i sommar. Forresten trivst eg grueleg godt heime.



For å se innholdet må du ha gyldig abonnement.

Hvis du allerede har abonnement, logg inn via Min Side:

Logg inn

Nyheter fra andre aviser

Jærbladet

Strandbuen

Solabladet

Sandnesposten

Gjesdalbuen

Avisen Agder

Do NOT follow this link or you will be banned from the site!