Du må være innlogget for å få tilgang til alle nyheter! Logg inn eller opprett brukerkonto.

Lena Bjerke

Lena Bjerke

 

  Frå stjerner til nifse kyr Alder: 40 år Bur: På Varp i Bjerkreim Aktuell: Begynte måndag som vikar for leiaren på kulturkontoret i Bjerkreim Via Husabø, Chicago, San Diego og Hollywood har ho no landa blant store kyr, men endå større kjærleik på Varp. Ho har gode minne om måla ho skåra på jentelaget til EIK tidleg på 80-talet, men dei neste trekka handlar om designarlivet i Chicago og Silicon Valley, om appelsintre i hagen og gåavstand til Stillehavet i San Diego, og om film-, funk- og modellsirkuset i Hollywood. Til Egersund kom ungdomsskulejenta flyttande frå Telemark då mora fekk seg jobb som spesialpedagog på Husabø skole. - Eg gjekk rakk ikkje å bli oransjeruss, men hugsar godt lærarane me hadde: Sigmund Birkeland, Sverre Sigmo med krøllene og rektor Sølvik. Med EIK sitt jentelag i fotball blei eg kretsmeister. Eg hadde visst knapt skåra før, men i ein av dei siste kampane laga eg to mål. Det var svært, mimrar Lena Bjerke. Som 20-åring flytte ho til USA. Som 40-åring hadde ho fått nok. - Det går ei grense; det kan bli for mykje spenning i livet. Eg blei utbrent av det overflatiske amerikanske, av forureining, bilkultur, av alle som går rundt og er levande reklameplakatar for seg sjølv - i tilfelle den dei slumpar til å snakka med, skulle vera ein filmagent, seier Lena Bjerke. Men ho fekk utretta mykje i USA før nok var nok. Først skaffa ho seg full universitetsutdanning innan kunst og design. Så blei det jobbar i reklamebyrå, designstudio og barnebokforlag i Chicago-området. I 1997, då .com-rushet sette inn for fullt, flytte ho til Silicon Valley. - Eg kjøpte mitt første domene i 1998, ler ho og fortel om konsulentoppdrag innan marknadsføring og visuell kommunikasjon for tungvektarar som Hewlett-Packard. I 1999 prøvde ho seg heime i Noreg, som avdelingsleiar ved Mediefabrikken i Akershus fylkeskommune, men det blei med eitt år. - Eg var ikkje klar for Noreg då, seier ho. Det bar tilbake til USA, denne gongen til San Diego. Der dreiv ho i fire år sitt eige designbyrå. - Det var ein fantastisk flott plass. Viss nokon for to år sidan, då eg sat blant palmetre og appelsintre i hagen og såg utover Stillehavet, hadde sagt at eg skulle hamna på ein gard i Bjerkreim, med jobb på kulturkontoret, ja då hadde eg ledd, smiler ho. Men sånn har det altså blitt. Visst var det nok av både spenning og oppdrag i Hollywood, dit ho flytte etter å ha gitt ifrå seg selskapet sitt. Ho dreiv med design av filmplakatar og cd- og dvd-cover, prøvde seg på filmproduksjon og blei meir og meir involvert i musikkproduksjon. - Det gjekk så langt at det blei spelt inn plate - med meg som artist, ler ho. Garageband.com, den eine av dei to største amerikanske nettsidene som promoterer nye artistar, kåra i fjor vinter Magdalena Highlander, som er artistnamnet hennar, til vekas funkartist. Under eit år etter er Lena Bjerke sjeleglad for å vera tilbake i gamlelandet. Det var etter råd frå ei venninne frå Eigersund at ho kom heim i fjor sommar, sette seg til i havgapet på Nærland og skreiv ei samling dikt som ho har illustrert med eigne fotografi. Kort tid etter dukka den store kjærleiken opp. Lena følgde hjertet til Varp i Bjerkreim. - Det er ei anna verd du har hamna i no, på kulturkontoret i Bjerkreim. Kva har du tenkt å gjera ut av den jobben? - Eg håper at eg kan inspirera unge i Bjerkreim til å tru på sin eigen kreativitet. Me kan gjera alt me vil her i livet, men éin ting om gongen. Å leva er som å klatra opp eit fjell; først når du kjem opp på den første knausen, får du nødvendig utsikt til å sjå kor vegen går vidare. Alt skjer når det skal, fastslår Lena Bjerke. - Kva skal du gjera i dag? - På arbeid skal me ha møte om Ungdommens kulturmønstring, som kjem opp ganske snart. Om kvelden lagar me noko "knæsj" til middag, med salat og eit glas raudvin. - Kva har du lyst å læra? - Eg vil gjerne læra å spela bassgitar. Eg speler ingen instrument i dag. - Er du ein dyrevenn? - Sjølv om eg hadde både katt og hund i oppveksten, er eg ikkje dyrevant. Men eg er avstandsforelska i dyr, og er litt hippieaktig idet eg aldri hadde gått og kjøpt meg ein revepels. Eg har klappa kalvane på garden der eg har busett meg, men styrer helst unna mødrene. Dei er frykteleg store, dei der kyrne. - Kva for ei årstid liker du best? Sommar og tidleg haust; kanskje fordi eg har bursdag i august. - Er du sportsleg? - Nei. Likevel elskar eg å gå tur i heia. - Kva kunne du ha skrive lesarbrev om? - Eg har ei meining om alt, så eg kunne ha skrive om det meste, for eksempel om foreldras ansvar for aktivitetsnivået til sine eigne tenåringar, om barns TV-bruk, om den kapitalistiske imperialismen... - Kva pleier du å gjera om sundagen? - Som regel går eg tur. Eg er alltid inne på internett ein tur. Viss det går noko bra, blir det gjerne eit kinobesøk. Problemet med kinoen i Egersund, er at me ikkje får vita kva for filmar som skal gå, før dei begynner å gå - omtrent. - Kva ville du ha brukt ein lottomillion til? - Eg ville ha investert pengane i firmaet mitt, Mooki. Eg designar kunstpelspledd; veldig stilig, abstrakt design. Pledda skal produserast i Kina. Ein avtale var nesten i hamn, men så blei eg ikkje einig med produsenten om pris. Eg må ta ein ny prat med kontaktpersonen min i Kina.



For å se innholdet må du ha gyldig abonnement.

Hvis du allerede har abonnement, logg inn via Min Side:

Logg inn

Nyheter fra andre aviser

Jærbladet

Strandbuen

Solabladet

Sandnesposten

Gjesdalbuen

Avisen Agder

Do NOT follow this link or you will be banned from the site!