Du må være innlogget for å få tilgang til alle nyheter! Logg inn eller opprett brukerkonto.

Torger Kløgetvedt

Torger Kløgetvedt

 

      Lommekjent på tunet Alder: 83 år Bur: Kløgetvedt Aktuell: Er med i Kløgetvedt-komiteen, som har ansvar for det sommaropne Kløgetvedttunet At ingen kjenner bygdetunet i Bjerkreim betre enn Torger Kløgetvedt, er ingen dryg påstand.   Bortsett frå året i militæret har Torger Kløgetvedt budd på Kløgetvedt heile livet sitt. For 83 år sidan blei han født på det som i dag er Kløgetvedttunet, eller «der heima» som han seier. - Far tok bureising i 1923 og bygde opp huset på det som seinare blei min gard. Eg var eitt år gammal då me flytte «der inn», fortel Torger Kløgetvedt. Det er bare to-tre hundre meter mellom huset hans «der inne» og Kløgetvedttunet «der heima», kort og grei arbeidsveg, altså, for den uoffisielle vaktmeisteren på bygdetunet. Eg tek rett som det er turen heim på tunet for å kontrollera at alt er i orden. Fleire gonger har eg avverja større skadar på den måten. Ein gong oppdaga eg lekkasje; heile kjøkkengolvet stod under vatn. Etter kraftig vind må eg alltid sjekka om det har falle av takstein, seier Torger Kløgetvedt. Han melde seg til teneste i Kløgetvedt-komiteen rundt 1986, eit par år etter at bygdetunet var etablert. Etter fleire og tjue år er han framleis ikkje lei. - Så lenge eg kan gjera nytte for meg, stiller eg opp, seier han. Komitévervet inneber dugnadsarbeid som vasking, rydding og raking før sesongopninga, og omvising ein del av sundagane i løpet av sesongen. Ein meir kompetent omvisar enn Torger skal det godt gjerast å finna til tunet der han kjenner kvar minste krinkelkrok. - Som liten sprang eg att og fram mellom huset vårt og bestemor og bestefar der heime på tunet, så eg er godt kjent, ja. I tillegg har eg vore så heldig å få kopi av eit stadnamnarbeid som blei gjort for ein del år sidan. Det er nedteikna over 200 namn på plassar på Kløgetvedt og i marka rundt garden. Eg trur eg kan seia at eg kjenner kvart einaste namn. Før i tida var det nyttig å ha namn på den minste haug og hammar. Når ein skulle ut og leita etter husdyr, for eksempel, var det greitt å kunna oppgi presist kor det skulle leitast, forklarer Torger Kløgetvedt. Komande sundag er det vanleg opningsdag på Kløgetvedttunet, utan noko spesielt program, men med omvising, kaffi- og lappesal. Tre sundagar med spesialkomponert program gjenstår denne sesongen: friluftsgudsteneste 2. august, slåttedag med sykkeltur 9. august og barnas dragedag med historieforteljing og songleikar 23. august. - Kva skal du gjera i dag? - Det er avhengig av vêret. Viss det er opphald, skal eg kle og repararera litt på ei gammal torvløe som står like ved vegen mellom Liabakkane og Kløgetvedt. Då me fekk Lyse-straumen i -52, blei det slutt på å skjera torv, så løa har ikkje vore i bruk sidan 1951 - bortsett frå ein gong Gaute Skretting hadde med seg ein skuleklasse og viste korleis dei gjorde det på gamlemåten. No har Gaute tankar om å ta løa i bruk i tilknyting til Kløgetvedttunet. Han ser føre seg ein torvskjeredag når løa ein gong er ferdig istandsett. Viss det regnar, skal eg ikkje ha problem med å finna noko anna vedlikehaldsarbeid. Regn er for eksempel godt vêr til å fila opp motorsagkjede. - Kva gjer du for å slappa av om sommaren? - Å du fælande hed! Det er først om kvelden eg slappar av. Då er eg som regel litt trøytt, så det er godt å setja seg i godstolen med avisa, eller for å sjå nyheitene. - Ferierer du helst i Noreg eller utlandet? - I Noreg. Eg skal ein tur med pensjonistlaget tidleg i august. Det blir ein rundtur på ei lita veke. - Kva et og drikk du helst om sommaren? - Å du og du! Der er så mykje godt. Eg liker veldig godt bacon og egg med jordeple attåt. I lengda er vatn det beste å drikka. Men Biola med blåbær er òg godt. - Sender du helst postkort, epost eller sms når du er ute på tur? - Eg ringjer. - Føretrekkjer du stranda eller fjellet om sommaren? - Fjellet. Eg er ein gammal jeger; gjekk på jakt til eg var 75, så eg har eit spesielt forhold til fjellet. - Har du eit spesielt sommarminne? - Det flottaste må vera då me stod på Nordkapp i klarvêr og midnattsol. Elles har eg mange fine naturopplevingar og mektige inntrykk frå fjellovergangane på Vestlandet. Der har eg kjørt fleire gonger. - Kva burde Dalane Tidende skriva meir om? - Eg tykkjer Dalane Tidende er eit veldig godt blad som går breitt ut og gir meg det lokalstoffet eg er interessert i. Eg er så gammal at eg kan seia det eg vil, så eg skrøyter ikkje bare for å vera gild. - Kven fortener ei rose? - Det må bli kona. Ho passar godt på meg.



For å se innholdet må du ha gyldig abonnement.

Hvis du allerede har abonnement, logg inn via Min Side:

Logg inn

Nyheter fra andre aviser

Jærbladet

Strandbuen

Solabladet

Sandnesposten

Gjesdalbuen

Avisen Agder

Do NOT follow this link or you will be banned from the site!