Du må være innlogget for å få tilgang til alle nyheter! Logg inn eller opprett brukerkonto.

Søskenbarn utan vinnarambisjonar

Søskenbarn utan vinnarambisjonar

Edel Karin Hovland og Ernst Mortensen er klar for Horve Duatlon under namnet Team Syskjenbadn. Arrangørane May Didriksen og Erik Torgersen i Dalane sykleklubb ser fram til å senda nærmare 40 stafettlag ut i løypene i Horve laurdag føremiddag. FOTO: Keth Odland

Sjølv om begge er syklistar, var ingen av dei to «syskjenbadna» freista til å finna seg ein løpssterk makker. For Team Syskjenbadn er det viktigare å ha det kjekt enn å nå høgt opp på resultatlista i Horve Duatlon.

Tekst:

Publisert:

Oppdatert:
11.11.2016 kl 10:33

Også i fjor, første gongen Horve Duatlon blei arrangert, var søskenbarna Edel Karin Hovland og Ernst Mortensen blant deltakarane.

– Me har vore med sidan starten, for å seia det sånn, så det begynner vel å bli ein tradisjon? ler Edel Karin Hovland.

Joggar med hunden

Konkurransen består av tre løpsetappar á 1,4 kilometer og to 3,7 kilometer lange sykkeletappar. Løparen begynner og avsluttar.

På laget Team Syskjenbadn er det eigentleg ingen løpar. Både Ernst Mortensen og Edel Karin Hovland liker seg best på to hjul. Begge er aktive i Dalane sykleklubb. Likevel har dei ikkje vurdert å slå seg i lag med kvar sin habile løpar for dermed å kunna hevda seg betre i konkurransen.

– Nei! Me er med for å ha det gøy og tek ikkje konkurransen så høgtideleg. Men nå som eg har fått meg hund, har eg begynt å jogga litt, blant anna her i Horve. Springing er derfor ikkje heilt framandt for meg, forsikrar Edel Karin.

Trenar med sykleklubben

I fjor hamna Team Syskjenbadn omtrent midt på treet.

– Det gjekk godt i fjor. Presterer me noko lunde likt i år, skal me vera godt fornøgde, seier Ernst.

Både han og Edel Karin trenar spinning og styrke med sykleklubben kvar veke. På laurdagane er dei med på klubben sine såkalla breiddeturar, det vil seia rolege langturar med relativt låg terskel. Men i morgon er breiddeturen erstatta av Horve Duatlon.

Uhøgtideleg

– For meg som bare kan småjogga, er løpsetappane i duatlonkonkurransen blytunge. Med ein så kort distanse blir det veldig intensivt. Men gøy er det, seier Edel Karin.

Erik Torgersen i arrangørkomiteen liker innstillinga til søskenbarna.

– Nokon er det saktens som toppar laget med ein god syklist og ein sprek løpar. Men viss alle hadde hatt ambisjonar om å vinna, hadde me ikkje fått mange deltakarar. Det er flott å kunna ta det litt uhøgtideleg, synest Torgersen.

Nesten i taket

Han er veldig godt fornøgd med interessa for arrangementet. Taket på 40 lag er nesten nådd.

– Me har sett 40 som tak for at det ikkje skal bli for kaotisk i løypene. Sjølv om me oppfordrar alle om å ta omsyn til kvarandre, er det alltid nokon som blir litt galne når dei får startnummeret på brystet. Me hadde 39 lag på lista, men har fått eit forfall, seier Erik Torgersen.

Snautt med jenter

Det er god aldersblanding på deltakarane.

– På laget som kallar seg EIK G12, er det, som namnet tilseier, to tolvåringar. Men jenter skulle me gjerne hatt litt fleire av, påpeiker Torgersen.

Ryktet om den artige duatlonkonkurransen i regi av Dalane sykleklubb og EIK friidrett har òg spreidd seg til atletar utanfor Dalane.

– Me har deltakarar frå både Bryne og Sandnes, seier Torgersen.

Vêrmeldinga tyder på perfekte forhold for både løp og sykling i Horve i morgon, akkurat som i fjor. Sannsynlegvis blir det litt mildare enn det har vore den siste veka, men deltakarane vil nok likevel setja pris på at safta dei får servert etter målgang, er varm.

Fjorårets vinnarlag Team Aase stiller også i år. På dette laget tar Gaute Brådli seg av syklinga mens Torstein Tengsareid spring.

Nøkkelord

Nyheter fra andre aviser

Do NOT follow this link or you will be banned from the site!