Du må være innlogget for å få tilgang til alle nyheter! Logg inn eller opprett brukerkonto.

To stykk Ingebrigtsen til Sentrumsløpet

To stykk Ingebrigtsen til Sentrumsløpet

VANN I 2014: For to år sidan vann Jakob Ingebrigtsen, som då bare var 13 år, Sentrumsløpet på tida 12,18. Kva er han god for i morgon? FOTO: Ole Kristian Larsen

I morgon skal ei ung, stigande verdsstjerne springa gjennom bygatene i Egersund, forhåpentlegvis i front for eit stort felt med like gira, bare ikkje fullt så raske løparar.

Tekst:

Publisert:

Oppdatert:
16.09.2016 kl 09:24

NRK-serien «Team Ingebrigtsen» har gjort Ingebrigtsen-familien frå Sandnes til allemannseige. I morgon arrangerer EIK friidrett Sentrumsløpet i Egersund, byen der farmora til Ingebrigtsen-søskena bur. To av løparsøskena blir å finna på startstreken på Grisatorget.

Trekkplaster

– Det er veldig kjekt at både Jakob (15) og Ingrid (10) Ingebrigtsen blir med på Sentrumsløpet. Forhåpentlegvis vil dei fungera som trekkplaster både for publikum og for andre som vurderer å stilla til start, seier løpsarrangør Thomas Hetland.

Han vil ha flest mogleg til å vera med å setja eit sprekt preg på Egersund sentrum i morgon.

Jakob Ingebrigtsen står på ingen måte tilbake for dei to eldre brørne sine, OL-deltakarane Henrik og Filip Ingebrigtsen. Sommaren brukte Jakob, som fyller 16 år på måndag, i stor grad til å setja uoffisielle verdsrekordar. I slutten av mai sprang han 1.500 meter på 3.45,50 i Belgia. Få dagar seinare forbetra han rekorden med 53 hundredelar på Jessheim, og under Bislett Games ei veke seinare smadra han også denne tida og noterte seg for utrulege 3.42,44.

NRK sin friidrettsekspert og OL-vinnar på 800 meter i 1996, Vebjørn Rodal, kalla prestasjonen i Belgia for vanvitig og antyda at resultatet til Jakob Ingebrigtsen var eitt av dei beste i norsk ungdomsidrett nokon sinne.

Ny Ingebrigtsen-pers?

Også for to år sidan var Jakob Ingebrigtsen med på Sentrumsløpet i det som ein gong var faren Gjert sin heimby. Då sprang han den snautt fire kilometer lange løypa på 12,18. Han var den gongen 21 sekund bak løyperekorden som Torstein Tengsareid sette året før, og som ennå står. Tengsareid stiller ikkje til start i morgon. EIK-løparen er ikkje fullt ut restituert etter VM i motbakkeløp for ei veke sidan, då han tok ein flott 14. plass.

Ikkje ei EIK-greie

Sentrumsløpet blir i år arrangert for fjerde gong, som eitt av løpa i EIK sin trimkarusell.

– I år blir dette det siste løpet i karusellen då me har kutta ut løpet som har pleidd å vera i slutten av oktober. Men sjølv om Sentrumsløpet inngår i trimkarusellen, er også løparar frå andre klubbar enn EIK svært velkomne til å delta. Tidlegare år har det kome fleire løparar frå blant anna Gjesdal og Bjerkreim. Det er veldig kjekt, seier Thomas Hetland, som i fjor vann Sentrumsløpet på tida 13,05.

Det er tre forskjellige løypelengder i Sentrumsløpet. Ungar under skulealder spring cirka 300 meter, frå Grisatorget til tidlegare Fokus Bank og tilbake igjen. Mellomløypa, som i utgangspunktet er meint for ungar frå første klasse til 13 år, er éin kilometer lang. Hovudløypa er på rett i underkant av fire kilometer, fordelt på to like rundar.

Publikumsvennleg

– Start og mål for alle er på Grisatorget. I den lange løypa spring løparane først ut mot kulturskulen. Deretter spring dei opp til Årstad og ned i Årstaddalen, Sokndalsveien tilbake mot byen, inn mot sentrum før Misjonshuset og ut i gågata igjen. Det er eit publikumsvennleg løp der det er mogleg å sjå løparane fleire gonger, seier Thomas Hetland.

Han lover is til alle ungane som deltek, premie til alle ungar som har delteke i minst fire av fem karuselløp og uttrekking av gåvekort blant dei vaksne som har delteke minst fire av fem gonger. Morgondagens vinnarar, av begge kjønn, blir òg premiert med gåvekort.

Nyheter fra andre aviser

Do NOT follow this link or you will be banned from the site!